ရေးသားသူ- စုသွေးနီ
အမျိုးသမီးအသံ အမျိုးသမီးအသံ စာစဉ်အမှတ် (၂) မှ ကောက်နုတ်ဖော်ပြသည်။
ကျွန်မ အမြဲတမ်းမေးလေ့ရှိတဲ့ မေးခွန်းတခုရှိပါတယ်။ လူ့လောကထဲကို လူသားတစ်ယောက် အဖြစ် ရောက်ရှိလာတဲ့အခါ ယောကျာ်း၊ မိန်းမကွဲပြားမှုသာ ရှိမယ်။ လူအဖြစ်ကနေ ဘာတွေကွာခြား သွားသလဲ ဆိုတာပါ။ အဲဒီမှာမြင့်မြတ်ခြင်း၊ နိမ့်ကျခြင်းတွေနဲ့ တိုင်းတာကြတဲ့အခါ အလိုလိုနေရင်း အမျိုးသမီးဆိုတာ ဒုတိယအဆင့်ကို ရောက်သွားရပါတယ်။ ဘာကြောင့်ပါလဲ။ မြင့်မြတ်ခြင်း၊ နိမ့်ကျခြင်းတွေကို ဘယ်သူတွေက သတ်မှတ်လိုက်ပါသလဲ။
အမျိုးသမီးအဖြစ် မွေးဖွားလာခြင်းကပဲ နိမ့်ကျမှုဖြစ်စေပါသလား။ လူ့အသိုင်းအဝိုင်းမှာ နိမ့်ကျခြင်း၊ အမြင်ကျဥ်းမြောင်းခြင်း၊ စိတ်သဘောထားသေးသိမ်ခြင်း စတာတွေဟာ အမျိုးသမီးတွေ အတွက် အမှတ်တံဆိပ်တွေ ဖြစ်စေခဲ့တယ်။ အမျိုးသားတစ်ယောက် မရင့်ကျက်ဘူး၊ စိတ်သဘော နုတယ်ဆိုရင်တောင် ကာယကံရှင်အမျိုးသားနဲ့ မသက်ဆိုင်ပဲ မိန်းမဆန်တယ်ဆိုတာမျိုးနဲ့ အမျိုးသမီး တွေအပေါ် အပြစ်ဖို့စေတယ်။
“အမျိုးသမီးအဖြစ် မွေးဖွားလာခြင်းကပဲ နိမ့်ကျမှုဖြစ်စေပါသလား။ လူ့အသိုင်းအဝိုင်းမှာ နိမ့်ကျခြင်း၊ အမြင်ကျဥ်းမြောင်းခြင်း၊ စိတ်သဘောထားသေးသိမ်ခြင်း စတာတွေဟာ အမျိုးသမီးတွေ အတွက် အမှတ်တံဆိပ်တွေ ဖြစ်စေခဲ့တယ်”
အမျိုးသား၊ အမျိုးသမီး တန်းတူအခွင့်အရေးလို့ ပြောဆိုနေရတာဟာ တန်းတူညီမျှမှု ရှိမနေလို့ ဖြစ်ပါတယ်။ ဦးဆောင်မှုအခန်းကဏ္ဍကိစ္စမှာ သာ၍ပြောရမယ် ထင်ပါတယ်။ အမျိုးသမီးတွေ နိုင်ငံရေးမှာ ပါဝင်နိုင်ရေး၊ အခြားသော ဦးဆောင်မှုအခန်းကဏ္ဍတွေမှာ ပါဝင်နိုင်ရေး၊ မြှင့်တင်ပေးရေး ဆိုတာ အပြောသက်သက်မဟုတ်ပဲ လက်တွေ့အစီအမံတွေနဲ့ မည်၍မည်မျှ အကောင်အထည်ဖော် လုပ်နိုင်သလဲဆိုတာ မေးခွန်းထုတ်စရာပင်။ လေ့လာဆန်းစစ်မှုအရ အမျိုးသားနဲ့ အမျိုးသမီးဟာ ခန္ဓာကိုယ်ဖွဲ့စည်းမှုအရ မတူညီပေမဲ့ စွမ်းရည်အရာမှာ အတူတူပင်ဖြစ်တယ် ဆိုပေမယ့် ဒီအခြေအနေ ကို လက်ခံနိုင်မှုမှာ အားနည်းနေဆဲ ဖြစ်ပါတယ်။
မြန်မာနိုင်ငံလို ဘာသာရေးအရ ဓလေ့ထုံးတမ်းအစဥ်အလာ လွှမ်းမိုးမှုတွေဟာ တိုင်းပြည် အုပ်ချုပ်ရေး၊ စီမံခန့်ခွဲရေးတွေမှာ ရောယှက်မှု၊ တချို့သော ဘာသာရေးဆိုင်ရာ ပြဌာန်းချက်တွေမှာ အမျိုးသမီးတွေအတွက် အလွန်သိမ်ငယ်မှုကို ဖြစ်စေပါတယ်။ မိရိုးဖလာ ပုံသေကားချပ်တွေ ဟာလည်း အမျိုးသမီးတွေရဲ့ ဘဝကို ပိုမိုခက်ခဲလာစေပါတယ်။ ပုံသေကားချပ် သတ်မှတ်ချက် တွေဟာ သမိုင်းစဥ် တလျောက် လူတို့ကျင့်သုံးတဲ့ အလေ့အထတွေဖြစ်ပါတယ်။
အမျိုးသမီးတွေကို ပုံဖော်ရာမှာ မီးဖိုချောင်၊ မှီခိုသူ၊ အားနည်းသူတွေအဖြစ်သာ ဖော်ပြကြ ပါတယ်။ အမျိုးသမီးတွေအပေါ် နယ်ပယ်စုံက ခွဲခြားထားမှုတွေကို အမျိုးသမီးတွေကိုယ်တိုင် သိရှိနားလည်ပြီး ပြုပြင်ပြောင်းလဲနိုင်ဖို့ ကြိုးစားအားထုတ်ရမှာ ဖြစ်ပါတယ်။ ပညာရေး ကဏ္ဍမှာလည်း အမျိုးသမီးတွေအနေနဲ့ အမျိုးသားတွေနဲ့ တန်းတူအခွင့်အရေး မရရှိနေတာ၊ ဆေးတက္ကသိုလ်ဝင်ခွင့် အမှတ်တိုးမြှင့်ထားတာ၊ အခြားသောဘာသာရပ်တွေကို အမျိုးသမီးများ ရွေးချယ်ခွင့်မရနိုင်အောင် ကန့်သတ်ထားခြင်းတို့ဟာ ပြုပြင်ပြောင်းလဲပစ်ရမယ့်ကိစ္စရပ်တွေအဖြစ် နားလည်လက်ခံဖို့ လိုအပ်ပါ တယ်။
အမျိုးသမီးတန်းတူအခွင့်အရေးအတွက် ကျွန်မတို့ အိမ်တွင်းကပင် စရမှာ ဖြစ်ပါတယ်။ အိမ်ထောင်စုဇယား၊ မှတ်ပုံတင်တွေမှာ အမျိုးသမီးတွေကို မှီခိုသူတွေအဖြစ်သာ မြင်တွေ့ရမှာ ဖြစ်ပါတယ်။ အမျိုးသမီးအများစုကလည်း ပုံမှန်လက်ခံစရာတခုအဖြစ် လက်ခံလိုက်ကြတဲ့အခါ အခွင့်အရေးဟာမှေးမှိန်ခဲ့ရပါတယ်။ ထင်ပေါ်သူ၊ ကျော်ကြားသူ အမျိုးသမီးတွေကို ကြည့်မယ်ဆိုရင် သူတို့ဖခင်၊ ခင်ပွန်းရဲ့ကျော်ကြားမှု၊ ထင်ပေါ်မှု၊ အရေးပါမှု နောက်မှာသာ ရှိနေတတ်ပါတယ်။
အမျိုးသမီးတို့ရဲ့ ကိုယ်ပိုင်စွမ်းဆောင်ရည်၊ အရည်အချင်းကို အသိအမှတ်ပြုခံရမှုက အတော် ရှားပါတယ်။ ကိုယ်ပိုင်အရည်အသွေးနဲ့ ကိုယ့်ကိုယ်ကို ထူထောင်ထားနိုင်တဲ့ အမျိုးသမီးတွေမရှိဘူးလို့ မဆိုလိုပါဘူး။ စာပေ၊ ဂီတ၊ အနုပညာနဲ့ အခြားသောအတတ်ပညာပိုင်းတွေမှာ စွမ်းဆောင်ရည် မြင့်မြင့်မားမားနဲ့ ရပ်တည်နေတဲ့အမျိုးသမီးများစွာ ရှိနေပါတယ်။
နိုင်ငံရေးကဏ္ဍကို ကြည့်မယ်ဆိုရင်လည်း အမျိုးသားတွေသာ ကျင်လည်ရာနေရာတခုအဖြစ် သတ်မှတ်ထားပြီး အမျိုးသမီးတွေအနေနဲ့ နိုင်ငံရေးမှာ တက်ကြွစွာပါဝင်လှုပ်ရှားမှုကို အမျိုးသား နည်းတူ ကြိုဆိုလက်ခံမှုနဲ့ပတ်သက်ပြီး အားနည်းနေပါသေးတယ်။ နိုင်ငံရေးအရ ဆုံးဖြတ်ချက်ချတဲ့ နေရာမျိုးမှာ အမျိုးသမီးတွေရဲ့ မှတ်ချက်ပြုမှုကို ခံစားချက်နဲ့ ရောနှောပစ်တတ်သူ၊ နူးညံ့ပျော့ပြောင်း သူတွေအဖြစ် သတ်မှတ်ကြတတ်ပါတယ်။ ဒီအမြင်ယူဆချက်တွေဟာ ကာလရှည်ကြာလာတဲ့အခါ သတ်မှတ်ချက်တွေအဖြစ် တည်မြဲလာစေပါတယ်။
အမျိုးသမီးအခန်းကဏ္ဍ မြှင့်တင်ရေးလို့ဆိုရာမှာ မူလပုံစံခွက်တွေဖြစ်တဲ့ စက်ချုပ်၊ အချက်အပြုတ်၊ အထည်ရက်လုပ်၊ ဇာထိုးပန်းထိုး၊ အခန်းအနားတွေမှာ ဧည့်ခံကြိုဆိုရေးအဖြစ် သုံးတာတွေ မဖြစ်သင့်တော့ပါဘူး။ နိုင်ငံရေးရုံးခန်းတွေ၊ စစ်ဘက်ဆိုင်ရာဌာနတွေ၊ စီးပွားရေးကဏ္ဍ တွေ၊ သတင်းဌာနတွေ စတဲ့အလုပ်တာဝန်တွေမှာ ပါဝင်လာနိုင်ဖို့ လက်တွေ့ကျတဲ့ ပံ့ပိုးမှုတွေ ဖော်ဆောင်ပေးဖို့ လိုအပ်ပါတယ်။ နိုင်ငံ့ခေါင်းဆောင်တွေမှာ အမျိုးသမီး ဘယ်နှစ်ယောက်ပါသလဲ။ ပါတီထဲ၊ လွှတ်တော်ထဲ၊ နိုင်ငံရဲ့စီမံခန့်ခွဲရေးဝန်ကြီးဌာနတွေထဲမှာ အရည်အချင်းရှိတဲ့ အမျိုးသမီးတွေ ပါဝင်လာစေရေးအတွက် အလေးထား လုပ်ဆောင်သင့်ပါတယ်။
လက်ရှိမြန်မာ့နိုင်ငံရေးအခြေအနေအရ မတည်ငြိမ်မှုတွေ၊ စစ်ရေးပဋိပက္ခတွေအကြား ပြည်သူလူထုတွေ ဘက်ပေါင်းစုံက ဒုက္ခများစွာ ရင်ဆိုင်နေကြရပါတယ်။ အခြေအနေ အရပ်ရပ်တိုင်းမှာ နစ်နာချက်တွေ၊ အခက်အခဲပြဿနာတွေဟာ အမျိုးသမီးတွေအပေါ် များစွာသက်ရောက်မှု ရှိပါတယ်။ ထိုသို့သော အခက်အခဲများအကြား ရုန်းကန်ကြိုးစား ရပ်တည်နေကြတဲ့ အမျိုးသမီး များစွာရဲ့ အံ့မခန်းစွမ်းအားကို အသိအမှတ်ပြုရမှာ ဖြစ်ပါတယ်။
အမျိုးသမီးတွေ အဘယ်မှာ အားပျော့နေပါသလိမ့်။ အဘယ်လောက် ရဲရင့်ကြပါလိမ့်။ အထင်းသား မြင်နေကြရပါတယ်။ ရဲရင့်တဲ့စိတ်ဓာတ်နဲ့ နူးညံ့သိမ်မွေ့တဲ့စိတ်ထားတို့ ပေါင်းစပ်ပြီး အနာဂတ်လူ့ဘောင်အတွက် ပိုမိုကောင်းမွန်တဲ့၊ ခွင့်တူညီမျှတဲ့ လူ့အသိုက်အဝန်းအဖြစ် ကြိုးစား ဖော်ဆောင်ရမဲ့ အချိန်အခါကို ရောက်ရှိနေပါပြီ။
ခွဲခြားဆက်ဆံမှုကို ဖြစ်စေတဲ့ ဥပဒေတွေကို လက်မခံဘဲ၊ လူ့အဖွဲ့အစည်းကို အမျိုးသားတွေ ထိန်းချုပ်ထားခြင်းကို တွန်းလှန်ပစ်ရမှာပါ။ ယနေ့အချိန်အခါဟာ အမျိုးသမီးနဲ့ အမျိုးသားတို့ အတူတကွပူးပေါင်းဆောင်ရွက်မှုနဲ့ ပြောင်းလဲခြင်း၊ ခွဲခြားသတ်မှတ်မှုမရှိတဲ့ လူ့ဘောင်အဖွဲ့အစည်း အသစ်ကို တည်ဆောက်ဖို့အတွက် အချိန်တန်ပါပြီ။
လူ့အဖွဲ့အစည်းအတွင်း ယောကျ်ား၊ မိန်းမ အခန်းကဏ္ဍသတ်မှတ်ထားခြင်းတွေကို ပြောင်းလဲပစ်ဖို့၊ မတူကွဲပြားတဲ့ လူ့အသိုင်းအဝိုင်းအတွင်း အမျိုးသားကြီးစိုးတဲ့ စံနှုန်းတွေ၊ ဓလေ့တွေ၊ အဖွဲ့အစည်းတွေကို ပြုပြင်ပြောင်းလဲဖို့အချိန်တန်ပြီ ဖြစ်သလို တန်းတူညီမျှမှုနဲ့ လူတစ်ဦးချင်း၊ အစုအဖွဲ့တခုချင်းရဲ့ ကိုယ်ပိုင်ပြဌာန်းခွင့်၊ ဆုံးဖြတ်ပိုင်ခွင့်ကို လိုလားတဲ့ အမျိုးသမီးဝါဒီတွေ ကောင်းစွာဖွံ့ဖြိုးတိုးတက်တဲ့ အချိန်အခါကို ရောက်ရှိနေပြီ ဖြစ်ပါတယ်။
“အမျိုးသမီးအခန်းကဏ္ဍ မြှင့်တင်ရေးလို့ဆိုရာမှာ မူလပုံစံခွက်တွေဖြစ်တဲ့ စက်ချုပ်၊ အချက်အပြုတ်၊ အထည်ရက်လုပ်၊ ဇာထိုးပန်းထိုး၊ အခန်းအနားတွေမှာ ဧည့်ခံကြိုဆိုရေးအဖြစ် သုံးတာတွေ မဖြစ်သင့်တော့ပါဘူး”
"အမျိုးသမီးအသံ အမျိုးသမီးအားမာန်" စာစဉ် (၂) ကို အောက်ပါ Link မှာ Download ဆွဲပြီး ဖတ်ရှုနိုင်ပြီ ဖြစ်ပါတယ်။
https://drive.google.com/file/d/1i6Euc_oBjzLGxrneM4EXGO0GvhF-IRGT/view?usp=drive_link
#politicsforwomenmyanmar
#whatishappeninginmyamar
#Advocacy
#politics
#media
