ရေးသားသူ- ညီမလေးကို အရမ်းချစ်တဲ့
မမဆိုဖီယာ
အမျိုးသမီးအသံ အမျိုးသမီးအသံ စာစဉ်အမှတ် (၃) မှ ကောက်နုတ်ဖော်ပြသည်။
ညီမလေးရေ….။
အဝေးတနေရာဆီက စာရေးလိုက်ပါတယ်။ နေကောင်းကျန်းမာပါစေ၊ အန္တရာယ်ကင်းပါစေလို့ အရင်ဆုံးဆုတောင်းပေးလိုက်ပါတယ်။
အေးချမ်းမှုမရှိတဲ့ကာလမှာမှ လူဖြစ်ကြရတဲ့ တို့တွေအတွက် ပျော်ရွှင်စရာရော၊ ရင်ခုန်စရာရောက ဆိတ်သုဉ်းလို့ နေတယ်။ ချစ်သူတွေနဲ့ ဝေးပြီး သူစိမ်းတွေ ကြားမှာ နေနေရတဲ့ ညီမလေးရေ၊ စစ်ရှောင်စခန်းကို အိမ်လုပ်ပြီး နေနေရတဲ့ ညီမလေးမှာ လုံခြုံပါစေလို့ ဆုတောင်း မပေးတော့ပါဘူး။ လုံခြုံရေးကို အထူးကရုစိုက်ပါလို့ဘဲ ပြောချင်ပါတယ်။
တောကြီးမျက်မဲထဲမှာ ရာသီဥတုက ကြမ်းသလို လူတွေရဲ့ စိတ်ထားကလည်း မနူးညံ့တော့ဘူး။ အေးချမ်းမှုကို ကိုယ်တွင်းမှာ ရှာဖွေပြီး ကြိုးစားပြီး ကောင်းကောင်းမွန်မွန်ရှင်သန်ပါလို့ဘဲ ပြောချင်ပါတယ်။
ဒီတခါ ညီမလေးကို အထူးတလည် ပြောချင်တာက ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ လိင်ပိုင်းဆိုင်ရာ အကြမ်းဖက်မှုတွေ မြှင့်တက်နေတဲ့အကြောင်းနဲ့ အခုလိုအချိန်အခါမှာ ဒီလိုအကြမ်းဖက်မှုတွေကို ကိုယ်တိုင်ရော၊ ပတ်ဝန်းကျင်မှာပါ မဖြစ်အောင် သတိထားဖို့ မှာချင်ပါတယ်၊
အကြမ်းဖက်မှုဆိုတာ ဘယ်တော့မှ ကောင်းတဲ့အရာမဟုတ်ပါဘူး၊ ဘယ်အချိန်၊ ဘယ်လို အခြေအနေမှာဘဲဖြစ်ဖြစ် ဈေးလျော့ပေးလို့ရတဲ့ အပြုအမူမဟုတ်ပါဘူး။ ဘယ်သူဘဲ ကျူးလွန်သည်ဖြစ်စေ မကောင်းမူဘဲ ဖြစ်တယ်။ အိမ်နဲ့ ဝေးနေသူတွေ အချင်းချင်းကြားမှာဆို ပိုတောင် မဖြစ်သင့်တဲ့ ကိစ္စပေါ့။
ညီမလေးကို မှာချင်တာက ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ လိင်ပိုင်းဆိုင်ရာ အကြမ်းဖက်မှုကို မဖြစ်အောင် ကြိုတင်ကာကွယ်တဲ့အနေနဲ့ တဖက်တလမ်းကနေ ညီမလေး အားတဲ့အချိန်မှာ နီးစပ်ရာ လူတွေကို အသိပညာမျှဝေပေးပါ။
ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ လိင်ပိုင်းဆိုင်ရာ အကြမ်းဖက်မှု ရဲ့ သားကောင် မဖြစ်အောင် ညီမလေး အများကြီး ကြိုးစားပေးလို့ ရပါတယ်၊ ဒီလိုအကြမ်းဖက်မှုတွေ ဖြစ်တဲ့ လူမှုအသိုက်အမြုံဟာ အချင်းချင်းကြား မယုံကြည်မှုတွေ၊ လုံခြုံမှု မခံစားရတာတွေကနေ စိတ်ဝမ်းကွဲပြီး ပြိုကျတတ်တယ်။
ဘာဘဲဖြစ်ဖြစ် အမျိုးသားဖြစ်ဖြစ်၊ အမျိုးသမီးဖြစဖြစ်၊ LGBT ဘဲ ဖြစ်ဖြစ် ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ လိင်ပိုင်းဆိုင်ရာ အကြမ်းဖက်မှု မဖြစ်အောင် လုပ်ဆောင်လို့ ရသလို၊ လုပ်ဆောင်ပေးဖို့လည်း လိုပါတယ်။
ဥပဒေမရှိတဲ့ တောကြီးမျက်မဲမှာ ရဲဘော်ရဲဘက်အချင်းချင်းကိုဘဲ မိသားစုလုပ်ပြီးနေရတဲ့ အချိန်မှာ အားလုံးအတွက် မကောင်းတဲ့ ဒီအကြမ်းဖက်မှုကြီးမဖြစ်အောင် ညီမလေးနဲ့ ညီမလေးရဲ့ ရဲဘော်ရဲဘက်တွေကို အားကိုးတကြီးနဲ့ ဒီစာကို ရေးလိုက်တာပါ။
ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ လိင်ပိုင်းဆိုင်ရာ အကြမ်းဖက်မှုအကြောင်းကို အသေးစိတ် ရေးထားတဲ့ “အမှောင်တခြမ်း” ဆိုတဲ့ စာအုပ်လေးကိုလည်း စာနဲ့အတူ ထည့်ပေးလိုက်ပါတယ်။
အကြမ်းဖက်မှုကင်းတဲ့ လူမှုအသိုက်အမြုံတစ်ခု ဖြစ်ဖို့ ညီမလေးကို အားကိုးလိုက်ပါရစေ။
အမျိုးသမီးအသံ အမျိုးသမီးအားမာန် စာစဉ် အမှတ် (၃) ကို အောက်ပါလင့်ခ်တွင် အပြည့်အစုံ ဖတ်ရှုနိုင်ပြီ ဖြစ်ပါတယ်။
https://drive.google.com/file/d/1p8Hau9E3N-m95SrSjIJyZOlcDp6xoX0p/view?usp=sharing
#politicsforwomenmyanmar
#whatishappeninginmyamar
#Advocacy
#politics
#media
