ရေးသားသူ- အဖြူ
အမျိုးသမီးအသံ အမျိုးသမီးအသံ စာစဉ်အမှတ် (၃) မှ ကောက်နုတ်ဖော်ပြသည်။
“လိင်ပိုင်းဆိုင်ရာထိပါးနှောင့်ယှက်မှု၊ လိင်ပိုင်းဆိုင်ရာအကြမ်းဖက်မှု” ဆိုတာကို အမျိုးသမီး သုံးဦးမှာ တစ်ဦးလောက်က တနည်းမဟုတ်တနည်း ကြုံတွေ့ဖူးကြမှာပါ။ “လိင်ပိုင်းဆိုင်ရာထိပါး နှောင့်ယှက်မှု” လို့ဆိုရာမှာလည်း “လမ်းသွားရင်းနဲ့ပြွတ်ပြွတ်” ဆိုတဲ့အသံပေးတာ၊ ဘတ်စ်ကား စီးတဲ့အခါမှာ အမျိုးသမီးရဲ့ ခန္ဓာကိုယ်ကို အသားယူထိပါးတာ၊ အမျိုးသမီးဝတ်ထားတဲ့ အဝတ်အစား၊ ခန္ဓာကိုယ်ပုံပန်းစတာတွေကိုကြည့်ပြီး နှုတ်ကထိပါးပြောဆိုတာ စတာတွေကစလို့ “ရာထူးတိုးချင်ရင် ငါနဲ့အိပ်ရမယ်” ဆိုတဲ့ အခြေအနေတွေအထိ ပါဝင်ပါတယ်။
အမျိုးသမီးထုကိုယ်တိုင်လည်း ငယ်ငယ်ကတည်းက လမ်းသွားရင်း အထက်ပါအတိုင်း ပြောဆိုခံရတာ၊ ဘတ်စ်ကားတိုးစီးချိန်တိုင်း လိင်ပိုင်းဆိုင်ရာထိပါးမှု တမျိုးမဟုတ်တမျိုးနဲ့ ကြုံကြရပါတယ်။ ကားကလူကြပ်လို့ပင်ပန်းရတဲ့အထိ လိင်ပိုင်းဆိုင်ရာထိပါးမှုနဲ့ မကြုံရအောင် ရှောင်တိမ်းနေရ၊ အဲ့ဒီလိုနေတဲ့ကြားက ကျူးလွန်ခံရရင်လည်း လူကြားထဲဖော်ထုတ်မပြောရဲတာ စတာတွေကြောင့် ကျူးလွန်သူတွေက အတင့်ရဲလာတဲ့အနေအထားလို့ ဆိုရမှာဖြစ်ပါတယ်။
အဲ့ဒီနေရာမှာ ဘက်စ်ကားစီးသူအမျိုးသမီးတွေ ခံစားရတဲ့ စိတ်မလုံခြုံမှုမျိုးကို အမျိုးသမီးတွေ ကိုယ်တိုင်သာ နားလည်နိုင်ပါတယ်။ အခုနောက်ပိုင်းမှာတော့ အမျိုးသမီး တော်တော်များများက ဘက်စ်ကားပေါ်မှာ ဒီလိုဖြစ်စဉ်ကြုံရရင် ကားပေါ်မှာထုတ်ဖော်ပြောတာ၊ ကျူးလွန်တဲ့သူရဲ့မျက်နှာကို ဓာတ်ပုံရိုက်ပြီး လူမှုကွန်ရက်ပေါ်တင်တာစတဲ့ နည်းလမ်းတွေနဲ့ တုံ့ပြန်လာကြပါပြီ။ တချို့သော အမျိုးသားတွေကလည်း အကူအညီပေးတာမျိုးတွေ ရှိလာပါတယ်။ ဥပဒေပိုင်းဆိုင်ရာအရ ဒီလူကို အရေးယူလို့ မရရင်တောင်၊ ထုတ်ဖော်ပြောဆိုခြင်းက ကျူးလွန်သူတွေကို လက်တွန့်သွားစေမယ်လို့ မြင်ပါတယ်။
ဒါကတော့ အမျိုးသမီးတွေနေ့စဉ်ကြုံနေရတဲ့ လိင်ပိုင်းဆိုင်ရာနဲ့ပတ်သက်တဲ့စိန်ခေါ်ချက်တွေ ဖြစ်ပါတယ်။ ဒါတင်မကသေးပါဘူး။ လုပ်ငန်းခွင်မှာ၊ မိသားစုအတွင်းမှာ၊ ပတ်ဝန်းကျင်မှာလည်း ရင်းနှီးသူတွေက ကျူးလွန်တဲ့ လိင်ပိုင်းဆိုင်ရာထိပါးမှုတွေ ရှိပါသေးတယ်။ တခါတရံမှာ ကျူးလွန်သူ တွေဟာ အမျိုးသမီးတွေရဲ့ ဆွေမျိုးရင်းခြာ၊ အထက်လူကြီး၊ ဆရာဖြစ်သူ၊ ကိုးကွယ်တဲ့ ဘာသာရေး ခေါင်းဆောင်တွေ စတဲ့သူတွေလည်း ဖြစ်နေတတ်ပါတယ်။
ဒီလိုပါဝါရှိသူတွေရဲ့ကျူးလွန်မှုတွေခံရတဲ့အခါ အမျိုးသမီးတွေအနေနဲ့ထုတ်ဖော်ပြောဆိုဖို့ရာ အတော်လေး ခက်ခဲပါတယ်။ ပြောလိုက်ပြန်ရင်လည်း ပတ်ဝန်းကျင်က ဒီလူက ဒီလောက်တော်တာ၊ စေတနာရှိတာ၊ လူကြီးလူကောင်း ပီသတာ။ ဒီလိုမလုပ်လောက်ပါဘူးဆိုတဲ့ တဖက်ပိတ်အမြင်တွေ အပြောတွေကိုလည်း ရင်ဆိုင်ရပါတယ်။
“သူက ဒီလိုစိတ်မဟုတ်လောက်ပါဘူး။ သမီးလေးလို ညီမလေးလို ချစ်လို့နေမှာပါ” ဆိုပြီး ကျူးလွန်ခံရသူရဲ့ ထုတ်ဖော်ပြောဆိုမှုကို ယိုင်နဲ့စေတဲ့ လုပ်ရပ်တွေကို ပတ်ဝန်းကျင်က လူတော်တော်များများက ပြုမူတတ်ကြပါတယ်။ ဒါ့အပြင် “နင်က ဒီလိုဝတ်ထားတာကိုး၊ ဒီလိုနေတာကိုး၊ နင်အနေအထိုင်မတက်လို့” ဆိုတဲ့ ပြစ်တင်မှုတွေကိုလည်းခံရပါသေးတယ်။
ဒီတော့ အမျိုးသမီးတွေအနေနဲ့ ကိုယ်ကထုတ်ဖော်ပြောရင် ကိုယ့်ဘက်မှာ ဘယ်သူမှမရှိတဲ့ အတွက် ထုတ်ဖော်ပြောဆိုဖို့ရာ ခက်ခဲသွားပါတယ်။ ကျူးလွန်သူတွေအနေနဲ့ကလည်း ထုတ်ဖော် ပြောဆိုမခံရတဲ့အခါ ထပ်မံကျူးလွန်မှုနဲ့ သံသရာလည်နေပါတယ်။
လက်ရှိနွေဦးတော်လှန်ရေးကာလမှာလည်း စစ်ကောင်စီဘက်က ကျူးလွန်တဲ့ လိင်ပိုင်း ဆိုင်ရာအကြမ်းဖက်မှုတွေတင်မကပဲ၊ တော်လှန်ရေးဘက်တော်သားတွေက ကျူးလွန်နေတဲ့ လိင်ပိုင်းဆိုင်ရာအကြမ်းဖက်မှုတွေ မကြားချင်မှ အဆုံးပါပဲ။ ဒါတွေအတွက် ထိရောက်တဲ့ အပြစ်ပေးမှုတွေ လက်ရှိအချိန်အထိ မဆောင်ရွက်နိုင်သေးပါဘူး။
အမျိုးသမီးတွေဟာ ခေတ်အဆက်ဆက်ကတည်းက လူ့အခွင့်အရေးအတွက်တိုက်ပွဲဝင်ရ၊ ဖိုဝါဒကြီးစိုးမှုကို တော်လှန်ရ၊ အာဏာရှင်ကိုလည်း တွန်းလှန်နေရပါတယ်။ တော်လှန်ရေးမှာ ပါဝင်နေတဲ့ အမျိုးသမီးတွေနဲ့ ပြည်သူအမျိုးသမီးတွေအတွက် လိင်အကြမ်းဖက်မှုတွေ ရင်ဆိုင်ရတဲ့ အခါ ထုတ်ဖော်ပြောဆိုနိုင်အောင်၊ ကျူးလွန်သူကို အပြစ်ပေးနိုင်အောင် တရားမျှတမှုကို ဖော်ဆောင် ပေးသင့်ပါတယ်။
လက်ရှိကာလတွေမှာ လိင်ပိုင်းဆိုင်ရာ အကြမ်းဖက်ခံရတဲ့အမျိုးသမီးတွေကို “ဒီကိစ္စတွေ နောက်မှပြော တော်လှန်ရေးကအရင်လုပ်” လို့ ပြောဆိုနေတာဟာ ကျူးလွန်သူတွေကို လွတ်မြောက်ခွင့်ပေးနေတာ၊ အားပေးတာနဲ့အတူတူပဲ ဖြစ်ပါတယ်။
လက်ရှိကာလတွေမှာ လက်ရှိကာလတွေမှာ လိင်ပိုင်းဆိုင်ရာ အကြမ်းဖက်ခံရတဲ့အမျိုးသမီးတွေကို
“ဒီကိစ္စတွေ နောက်မှပြော တော်လှန်ရေးက အရင်လုပ်”
လို့ ပြောဆိုနေတာဟာ ကျူးလွန်သူတွေကို လွတ်မြောက်ခွင့် ပေးနေတာ၊ အားပေးတာနဲ့အတူတူပဲ ဖြစ်ပါတယ်။
အမျိုးသမီးတွေအနေနဲ့လည်း ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ လိင်ပိုင်းဆိုင်ရာ အကြမ်းဖက်ခံမှုတွေ ကြုံတွေ့ရတယ်ဆိုရင် ထုတ်ဖော်ပြောဆိုဖို့က ပထမခြေလှမ်းလို့ သတ်မှတ်ကာ ထုတ်ဖော်ပြောဆိုသင့်ပါတယ်။ ဒါမှသာ ထုတ်ဖော်ပြောဆိုခြင်းကြောင့် ကျူးလွန်သူတွေဟာ တရားဥပဒေအရ အပြစ်ပေးအရေးယူမှုတွေ မရရှိနိုင်တဲ့အခြေအနေမှာတောင် ဆက်လက်ကျူးလွန်ဖို့ အတိုင်းအတာတစ်ခုအထိ ဟန့်တားနိုင်သလို၊ ခတ္တခဏရပ်တန့်သွားမှာ ဖြစ်ပါတယ်။
လူမှုအသိုင်းအဝိုင်းအနေနဲ့လည်း ထုတ်ဖော်ပြောဆိုတဲ့ အမျိုးသမီးတွေဘက်က ရပ်တည်ပေးဖို့နဲ့ ကျူးလွန်သူတွေကိုလည်း ထိုက်သင့်တဲ့ပြစ်ဒဏ်စီရင်မှုတွေ ပေါ်ထွက်လာအောင် ဝိုင်းဝန်းရပ်တည် အသံထွက်ပေးကြဖို့ တိုက်တွန်းလိုက်ရပါတယ်။
အမျိုးသမီးအသံ အမျိုးသမီးအားမာန် စာစဉ် အမှတ် (၃) ကို အောက်ပါလင့်ခ်တွင် အပြည့်အစုံ ဖတ်ရှုနိုင်ပြီ ဖြစ်ပါတယ်။
https://drive.google.com/file/d/1p8Hau9E3N-m95SrSjIJyZOlcDp6xoX0p/view?usp=sharing
#politicsforwomenmyanmar
#whatishappeninginmyamar
#Advocacy
#politics
#media
